講返我哋嘅行程, 由於落雨關係, 所以第一晚只係去到欣賞大馬戲, 當中最令我覺得好睇, 既緊張又刺激可算係類似摩天輪嗰個4人組表演, 事關表演場地下面係冇任何安全設備, 萬一有意外嘅話都會幾傷. 而其他例如空中飛人、動物表演等等同樣都咁好睇. 完場之後坐地鐵（漢溪長隆站)去返市中心食雙皮奶, 之後再嚟一個泰式洗頭, 真係一樂也!
戲肉嘅第二日, 雖然上晝都有幾陣雨, 但都總算天公造美, 之後不但冇雨落, 更有陽光出現! 成個人當堂開心晒, 因為落住雨玩真係好掃興. 我哋去到放底咗行李之後(有頗多locker供遊客租用), 就第一時間去到最近而又係最激嘅地方——垂直過山車, 坐上去真係可以用90度垂直望住地面俯衝, 感覺都係第一次, 相當刺激好玩. 其他仲有十環過山車、超級大擺鐘、U型滑板等等. 冇咁刺激嘅就有旋轉木馬、咖啡杯等. 我覺得今次喺時間上可以講得上perfect, 當我哋玩完一個機動遊戲後, 可以接住睇四維(4D)電影、真人表演show、仲有所謂嘅花車巡遊添!
我哋嘅下一個目標應該會係珠海海泉灣玩機動遊戲/水上樂園, 又或者係長隆水上樂園, 希望到時同樣會玩得好開心! 當然最緊要係唔少得同班friend一齊去啦!
沒有留言:
張貼留言